لما اتخطبت اكتشفت انى كنت بحبه بس بدرجة 20 % انما فى الخطوبه حسيت انى خلاااااص وصلت لقمة الحب ....
ولما كتبت الكتاب اكتشفت انى كنت بحبه بس بدرجة 60% وانى بعد كتب الكتاب خلااااااااص وصلت لأعلى درجة حب ومش ممكن يكون فيه أعلى من كده...
بعد الجواز اكتشفت انى كنت بحبه بس بدرجة 90 % وحسيت انى دلوقتى فعلا خلااااااااص وصلت ل 100% وعشت اسعد ايام حياتى وعرفت يعنى ايه حنان وأمان وحسيت بحاجات مكنتش عارفه انها موجودة أصلا......
بعد الحمل بقى اكتشفت ان فيه درجات أعلى من 100% وفيه حاجات تانيه غير الحب أكبر وأسمى وأحلى ممكن يكون هو ده العشق وممكن تكون هى دى الحاجه الى الرسول قال عليها لوأمرت أحدا ان يسجد لغير الله لامرت المرأة ان تسجد لزوجها ...
أنا عاوزة أحكى عن حاجه
هو حوار بينى وبين جوزى كل ما افتكره أحبه أكتر وأكتر
كان فيه فتره بقعد مش باكل حاجه لمدة يومين وتلاته .......... عمرو جه من الشغل مرة وطبعا مروقتش البيت عشان مش قادرة ومحضرتش الغدا عشان قرفانه
عمرو:كلتى حاجه يا حبيبتى من الصبح
هاله:لأ مليش نفس
عمرو : تحبى أعملك حاجه تاكليها
هاله : لأ مش عاوزة اكل اى حاجه
عمرو:تحبى أعملك ساندوتش جبنه
هاله : لأ أنا كرهت الجبنه من كتر ما كلتها
عمرو: تحبى تاكلى حلاوة مع القشطه
هاله : انت عاوز يجيلى سكر حمل
عمرو : معلش .... تحبى أعملك برجر او كبده من الفريزر
هاله............... فاصل من الترجيع ............ مش أنا قولتلك متجبش سيرة أى لحمه قدامى
عمرو : معلش يا حبيبتى مخدتش بالى
وبعد فترة هاله تصعب على عمرو علشان مكلتش حاجه
عمرو : تحبى اطلبلك حاجه من بره
هاله : لأ انت عارف أكل بره مش مضمون ومحدش عارف فيه ايه
عمرو : تحبى تاكلى مخلل حاف
هاله : انت عاوز يجيلى الضغط
عمرو مش عارف يعمل ايه وقرب يزهق بس مش بيبين علشان هاله متزعلش أو تتأثر
فى منتصف الليل والساعه 12
هاله : عمرو انا عاوزة شيبسى
عمرو : خلاص هجيبلك بكرة وانا راجع من الشغل
هاله: لأ أنا عاوزاه دلوقتى حالا
عمرو : احنا فى نص الليل يا حبيبتى
هاله : ما فيه محلات كتير لسه فاتحه
عمرو : أنا تعبان من كتر الشغل يا هاله ومش هقدر انزل دلوقتى تحبى نعمل بطاطس محمرة
هاله : مليش دعوة أنا عاوزة شيبسى دلوقتى حالا افرض كنت بتوحم يعنى يطلع كيس شيبسى فى قفا النونو عاجبك كدا؟
عمرو........... يقوم يلبس فى صمت عشان ينزل يجيب شيبسى ل النونو يطلع فى قفاه كيس شيبسى
هاله : تحس شويه على دمها ... عمرو خلاص انا ممكن استنى لحد بكرة بلاش تنزل دلوقتى
عمرو : ما بيصدق وبيدخل بسرعه يغير وينام قبل ما ترجع فى كلامها
هاله: انت ما صدقت.....
عمرو : ينااااااااام من كتر التعب
تانى يوم عمرو يجيب كيس شيبسى عائلى كبيييير ل هاله
هاله: تقوله أنا خلاص مش عاوزة أنا كنت عاوزاه انبارح
